Баткенде мектептер, бала бакчалардын баары азырынча иштебейт. Ал эми дүкөн, коомдук тамактануучу жайлар, банктарга 20-сентябрдан тарта иш баштоо эскертилгенин президенттин Баткен облусундагы өкүлү Абдикарим Алимбаев 19-сентябрда брифинг учурунда билдирди.
"Баткенде азырынча мектеп, бала бакчалар ачылбайт. Себеби эвакуация болгон айыл тургундары үйлөрүнө толук кайтып бара элек. Баткендин мэрине банктар, кафе-ашкана, дүкөндөр баары эртеңден тартып ишке кирсин деп тапшырма берилген. Мамлекеттик кызматкерлердин баары ишке чыкты", - деди Алимбаев.
Тажиктердин куралдуу кол салуусунан Баткен облусунда болжолдуу 282 турак жай, мектеп, бала бакчалар жана башка социалдык мекемелер жабыркаган. Кыргыз тарап 59 жаранын жоготуп, 183 адам жараат алды.
