12 жаштагы баласын сабаган ата кармалды

 Чүй облусунун Москва районунда 12 жаштагы баласын сабаган ата кармалды. Бул тууралуу Чүй облустук ички иштер башкы башкармалыгынын басма сөз кызматы билдирди.
 
Маалыматка ылайык, 16-мартта аймактык милициянын кызматкери милицияга кайрылып, 12 жаштагы Д.К. атасы тарабынан катуу сабалганын билдирген.
 
Факты Москва районунун ички иштер башкармалыгында катталган. Аталган факты боюнча КРнын Кылмыш-жаза кодексинин 138-беренеси «Кыйноо» менен кылмыш иши козголду.
 
Иликтөө иштеринин жүрүшүндө өспүрүмдүн денесинде ур-токмоктун жаңы жана эски жаракаттары бар экени аныкталган. Өспүрүм 34 жаштагы атасы тарабынан бир нече жолу сабалганы белгилүү болду. Баланын атасы кармалып, убактылуу кармоочу жайга киргизилди. 
 
Кылмыш иши боюнча соттук-медициналык экспертизалар дайындалды. Тергөө иштери уланууда.