Бишкек- Ош унаа жолуна чектөө киргизилди

Төө-Ашуу, Ала-Бел жана Өтмөк ашууларында саат 9.00дөн баштап жаан-чачындын көп болушуна жана кар күрткүсүнө байланыштуу транспорттун бардык түрлөрү үчүн кыймыл убактылуу чектелген. Бул тууралуу ИИМдин Жол кыймылынын коопсуздугу боюнча мамлекеттик инспекциясынын басма сөз кызматы билдирди.
 
Жалал-Абад облусунун "Чычкан" постунан Ош - Бишкек, Өтмөк ашуусу Талас - Бишкек багыттары транспортунт бардык түрлөрү үчүн убактылуу жабылган, Чүй облусунун Бишкек - Ош багыты боюнча Сосновка айылынан Төө-Ашуу жана Ала-Бел ашуулары аркылуу бардык ташуучу унаалардын кыймылы чектелген.
 
Жолду тазалоо иштери аяктагандан кийин кыймыл калыбына келтирилет.
 
Ички иштер министрлигинин Жол кыймылынын коопсуздугун камсыздоо башкы башкармалыгы айдоочуларды жолго чыгууну кийинкиге жылдырууну жана дөңгөлөктөрдү кышкыга алмаштырууну эскертет.