Өлкөдө COVID-19 илдетинин жайылышынын алдын алуу максатында санитардык эрежелерди толук сактоо менен жума намазын 11-июндан тарта мечиттерде окууга уруксат берилди. Бул тууралуу муфтияттан билдиришти.
Муну менен катар эпидемиологиялык кырдаалга байланыштуу республикадагы бардык мечиттерде сактык чаралардын сакталуусу талап кылынат.
Талаптар:- Күнүмдүк беш убак жана жума намазына келүүчү жарандардын бет кап тагынуусу талап кылынат;
- Мечиттин айланасына дезинфекциялоочу каражаттарды жана жарандардын дене табын текшерүү иш-чараларын жүргүзүү керек;
- Мечитте адамдардын ортосунда 1,5 метр аралыкты так сактоо жана мечиттин сыйымдуулугунун 50 пайыз ашпоосу зарыл;
- Жарандардын кол алышып, кучакташып көрүшүүсүнө тыюу салынат;
- Дааратты үйдөн алуу сунушталат;
- Жаш балдар жана ооругандар, дене табы көтөрүлүп жаткан жарандардын мечитке келбей туруусу талап кылынат;
- Мечитке келген жарандар көп убакытка кармалбай, 15-20 минуттун аралыгында чыгып кетүү сунушталат;
- Ар бир адам мечитке келгенде жайнамазын ала келүүсү сунушталат.
