Эртеңден тартып өлкөнүн бир топ шаарларында коменданттык саат киргизилет. Тыюу салынган учурда көчөдө жүргөндөрдү кандай жаза күтөөрүн Ички иштер министринин орун басары, Бишкек шаарынын коменданты Алмазбек Орозалиев айтып берди.
“Тыюу салынган учурда көчөдө жүргөн жарандар ички иштер органдары тарабынан өздүгүн жана көчөдө жүрүү себебин аныктоо үчүн чектөө убактысы бүткөнгө чейин убактылуу кармалат. Ал эми өздүгү аныкталбаган жарандар 3 суткага чейин камакка алынат жана шаар тургуну болуп чыкпагандар коменданттык аймактан чыгарылат“, – дейт Орозалиев.
