Эртеңден тарта өлкөдө коменданттык саат жарыяланат

Эртең, 25-мартта Бишкек, Ош, Жалал-Абад шаарларында жана Сузак, Кара-Суу, Ноокат райондорунда өзгөчө абал режими башталат. Тагыраак айтканда аталган шаарларда саат 20:00дөн 07:00гө чейинки коменданттык саат режими иштей баштайт.  Мындагы чектөөлөр тууралуу Бишкектеги онлайн маалымат жыйында ички иштер министринин орун басары Алмазбек Орозалиев айтып берди.

 «Жарандардын көчөдө жүрүүсүнө чектөөлөр киргизилет. Тагыраак айтканда, саат 20:00дөн 07:00гө чейинки коменданттык саат учурунда көчөдө жүргөнгө тыюу салынат. Шаардын конокторунан суранабыз, 25-мартта түнкү саат он экигечейин Бишкек шаарынан өзүңүздөрдүн аймактардагы үйүңүздөргө кетиңиздер», - деди А.Орозалиев.

Ошондой эле өзгөчө абал учурунда азык-түлүк дүкөндөрүнөн, дарыканалардан, банктардан жана күнүмдүк камсыздоо чөйрөлөрүнүн объекттеринен сырткары бүт баары жабык болоорун кошумчалады. 

Республикалык ыкчам штаб өзгөчө абал бар жерлерде коомдук унаалар эртең мененки саат 07:00дөн кечки саат 19:00гө чейин иштей турганын билдирди.