Кыргызстанда үч айдын ичинде 32 өспүрүм өз жанын кыйды

Быйылкы жыл чоңдор үчүн эле эмес, балдар үчүн да оор жыл болуп жаткандай. Буга болгону 3 айдын ичинде 30дан ашуун өспүрүмдүн өз жанын кыйганын мисал кылууга болот. Тактап айтканда, быйылкы жылдын алгачкы үч айында 32 бала өз жанын кыйды. Бул тууралуу 1-июнда Жогорку Кеңештин Бюджет жана каржы комитетинде маалымат берип жатып эмгек жана социалдык өнүгүү министри Улукбек Кочкоров билдирди.

Анын айтымында, 32 өлүмдүн 13ү коронавируска байланыштуу жарыяланган карантин маалында катталды. Парламенттик комитетте бүгүн “Балдар жөнүндө” кодекстин жаңы долбоору талкууланып жаткан учурда депутат Наталья Никитенко 2015-жылы кабыл алынган бул кодексти өзгөртүп, балдарды коргоо боюнча ишти күчөтүү зарыл экенин айтты.