Медицина кызматкерлерине турак-жай качан курулуп баштайт? Министрликтин жообу…

 Медицина кызматкерлери үчүн кызматтык турак жайдын курулушун 2023-жылы баштоо пландалууда. Бул тууралуу 24.kg агенттигине саламаттыкты сактоо министринин милдетин аткаруучу Жаркынбек Касымбеков билдирди.
 
Анын айтымында, күн тартибинде жер-жерлерде турак-жай маселеси чечилбеген жаш адистер үчүн аймактарда бекер өкмөттүк жер тилкелерине батирлерди куруу маселеси коюлган.
 
«Келечекте калк жыш жайгашкан аймактарга, өзгөчө Бишкек жана Ош шаарларына турак -жайга муктаж болгондорго көп кабаттуу үй курууну пландап жатабыз. Бул менин пландарым. Көптөгөн ведомстволор үчүн менчиктештирүү мүмкүнчүлүгү менен кызматтык турак-жай курулуп жатат. Бул вариантты да карап чыгышыбыз керек, антпесе жаш кадрларды кармап калуу абдан кыйын. Бул алар үчүн чоң стимул болмок», - дейт Жаркынбек Касымбеков.
 
Ошол эле учурда ал борбордо жер маселеси өтө оор экенин да белгиледи.
 
«Бирок Бишкектен бир аз алысыраакта, жада калса Чүй облусунда да бул маселени караса болот. Биз чоң пландарды коюп жатабыз, 2023-жылы бир нече социалдык турак жай объектилерин ишке киргизүүнү пландап жатабыз. Мамлекеттик ипотекалык компаниянын ишмердүүлүгүнүн алкагында атайын дарыгерлерди турак- жай менен камсыз кылуу да мүмкүн», - деди министр.