Элчи Жаныш Рустенбековдун дипломатиялык миссиясы аяктады…

 Кыргызстандын элчиси Жаныш Рустенбеков Тажикстандын тышкы иштер министри Сирожиддин Мухриддин менен анын өлкөдөгү дипломатиялык миссиясынын аякташына байланыштуу жолугушту.
 
Тышкы иштер министрлигинин басма сөз кызматы билдиргендей, актуалдуу маселелер, эки тараптуу кыргыз-тажик мамилелеринин учурдагы абалы жана өнүгүү келечеги, анын ичинде жарандардын укуктарын коргоо, ошондой эле чек ара жана аймактар аралык кызматташуу, талкууланды.
 
«Кыргыз-тажик мамлекеттик чек арасын делимитациялоо маселелерине өзгөчө көңүл бурулду. Тараптар кыргыз-тажик мамлекеттик чек арасын делимитациялоо жана демаркациялоо процессин тездетүү, ошондой эле Кыргыз Республикасы менен Тажикстан Республикасынын өкмөттүк делегацияларынын чек ара тилкесиндеги ишин активдештирүү зарылчылыгы тууралуу макулдашты»,-деп айтылат маалыматта.
 
Элчи Рустенбеков белгилегендей, мамлекеттер ортосундагы чек ара сызыгын аныктоонун аяктоосу чыңалууну басаңдатууга жана жалпысынан Кыргыз Республикасы менен Тажикстан Республикасынын чектеш аймактарындагы чыр-чатактарды жана инциденттерди кыскартууга оң таасирин тийгизет.