Баткенде чек арада дагы чыр чыкты, кыргызстандык жаран октон жаракат алды

Бүгүн 2-июнга караган түнү Баткенде кыргыз-тажик чек арасында дагы чыр чыкты. Баткен районунун Эски-Таш аймагынын 38 жаштагы тургуну октон жаракат алып, ооруканага түшкөн. Бул тууралуу Кыргызстандын Чек ара кызматы билдирди.

Маалыматка ылайык, окуя түнкү саат 01: 20 чамасында болгон. Ош-Исфана автожолунда бара жаткан кыргызстандын жаранына Тажикстан тараптан белгисиз адамдар бир нече жолу ок чыгарышкан. Кыргызстандык 37 жаштагы айдоочу октон жеңил жаракат алып, Самаркандек айылдык ооруканасына жеткирилген.
 
Окуя болгон жерге эки тараптын укук коргоо органдары барып, териштирүү иштерин жүргүзүүдө. Учурда кыргыз-тажик чек арасында абал туруктуу деп бааланууда.