"Мекен" тасмасынын жаратуучулары кинону өзгөртүүгө аргасыз болушту

Жаңы тартылып, тушоосу али кесиле электе айрым маанилүү жерлери кесилген “Мекен” тасмасынын режиссеру Медербек Жалилов берейин деген оюнун көрүүчүлөргө толук жетпей калганына капа. Ал тасма көрүүчүлөргө баштапкы версиясынан 20-30% өзгөртүлүп тартууланаарын маалымдады.

Тасма Кыргызстандын кен казуу тармагындагы коррупциялык система тууралуу баяндоо максатында тартылган.

Ички иштер министрлиги (ИИМ), Улуттук коопсуздук боюнча мамлекеттик комитет (УКМК), Саламаттык сактоо министрлиги, Дин иштери боюнча мамлекеттик комиссия, Маданият, маалымат жана туризм министрлиги жана “Кыргызкино” өкүлдөрүнөн турган комиссия көрүп чыккандан кийин бир катар сын айтылып, тасманын айрым жерлери кесилген.