Жашаган жер боюнча 1-класска электрондук каттоо аркылуу кабыл алынбай калган балдардын ата-энелери райондук билим берүү бөлүмүнө кайрылса болот. Бул тууралуу бүгүн маалымат жыйынында Билим берүү жана илим министрлигинин санариптик трансформация башкармалыгынын башчысы Нурлан Шаршенбай уулу журналисттердин суроосуна эооп берип жатып билдирди.
“Ата-энелер өздөрүнө жаккан мектептке баласын киргизүүнүү каалашат. Бирок биринде орун жок болсо, башкаларында бар. Ата-энелер системаны туура түшүнүүсү керек. Канча бала келсе да кабыл ала бергидей, мектептер резинадан жасалган эмес. Баланы өз учурунда 1-класска киргизүү ата-эненин түздөн-түз милдети. Ооба, билим берүү мекемелери жетишсиз экенин түшүнөбүз, бул боюнча министрлик, өкмөт иштеп жатат. Бирок кандай болгон күндө да ата-эне жоопкерчиликтүү болуш керек. Эгерде алардын шалаакылыгынан каттоодон кечигип калышса, райондук билим берүү бөлүмдөрүнө кайрылуу керек», - деди Нурлан Шаршенбай уулу.
Билим берүү жана илим министринин орун басары Токтобүбү Ашымбаева да ата-энелердин жоопкерчилигин баса белгиледи.
«Алар өз убагында Калкты тейлөө борборуна кайрылып, жашаган жери боюнча мыйзамдуу укуктарын каттоого алышы керек болчу. Февраль айынан тарта баланы 1-класска каттоо үчүн каякка кайрылуу керек жана кандай документтер керек экени так көрсөтүлгөн видеону ишке киргиздик», - деди ал.
Эскерте кетсек, бүгүн мектепке онлайн каттоо башталды.
