Ошто 26 жаштагы жаран өз атасын өлтүрүүгө шектелип кармалды

Ошто  адам өлүмү катталып, кылмышка шектүү катары 26 жаштагы жаран кармалды.  Бул тууралуу Ош ШИИБден билдиришти.
 
Алдын ала маалыматтарга караганда, адам өлтүрүүгө шектелип кармалган жаран маркумдун уулу болот. Окуя 7-апрелде болгон. Ош шаарында убактылуу жашап жүргөн Кара-Суу районунун Папан айыл аймагынын тургуну өз атасы менен чырдаша кетип, атасынын көкүрөк тушуна бычак менен эки ирет сайып жиберген. Алган жаракатынан улам шектүүнүн 1967-жылы туулган атасы окуя болгон жерде каза болгон. Кылмышка шектүү милицияга өзү барган. 
 
Шектүүнүн берген көрсөтмөсүнө караганда, экөө теӊ мас абалында болушкан. Ошол күнү маркум баласынын Ош шаарында убактылуу жашап жүргөн үйүнө барган. Пикир келишпестиктен ортолорунда чыр чыгып, окуя кайгылуу аяктаган.
 
Милициянын маалыматына ылайык, 1997-жылы туулган шектүү мурда 2 жолу соттолгон. Ал Ош шаардык ички иштер башкармалыгынын убактылуу кармоочу жайына киргизилди.
 
 Аталган кылмыш иши боюнча Кылмыш жаза кодексинин 122-беренесинин (адам өлтүрүү) негизинде кылмыш иши козголуп экспертизалар дайындалып, тергөө иштери жүрүп жатат.