1-февралда Бишкектин Биринчи Май райондук соту Даниел Ажиевди алты айга жашаган жери боюнча амбулатордук медициналык текшерүүдөн өткөрүү үчүн бошотту. Мындай чечимди судья Марат Сыдыков чыгарган.
Ажиев 2020-жылдын 26-мартында кармалган. Андан соң ал КР Кылмыш-жаза кодексинин 313-беренеси («Расалык, этностук, улуттук, диний же региондор аралык кастыкты козутуу) боюнча шектелип кармалган. Буга чейин Бишкек шаарында веб-камера моделдерди, сойкукананы кармаган деген айып тагылган.
Ажиев 2020-жылдын 21-октябрында Чүй облусунун Чым-Коргон айылындагы Республикалык психиатриялык ооруканага мажбурлап дарылоого жөнөтүлгөн.
Аталган оорукананын башкы дарыгери мажбурлап дарылоону психиатриялык стационардагы күчөтүлгөн режимден жашаган жери боюнча амбулатордук медициналык текшерүүгө өзгөртүү өтүнүчү менен сотко кайрылган. Башкы дарыгер соттук-психиатриялык экспертизанын 2022-жылдын 5-январындагы корутундусуна шилтеме жасап, бейтапта «истерикалык инсандык бузулуу» белгилерин аныктаган.
Башкы дарыгер Ажиевге сергек жашоого, коомдо жалпы кабыл алынган жүрүм-турум нормаларын сактоого, мыйзамсыз аракеттерден качууга жана алар үчүн жазанын сөзсүз болушуна «бекем багыт» берилгенин айтууда. Мындан тышкары, бейтаптын омурткасы оорусу бар экени, тынымсыз ооругандыктан адистештирилген клиникада дарыланууга муктаж экендиги, ал эми психиатриялык ооруканада мындай шарттар жок экени эске алынган.
Башкы дарыгердин айтымында, Ажиевдин психикалык абалы туруктуу, агрессивдүү-суициддик тенденциялар жок, коомдук коркунучтуу эмес, өзүн адекваттуу жана токтоо алып жүрөт. Ошондой эле жашы жете элек балдардын атасы, алардын бири майып. Ошондой эле карыган жана оорулуу энеси анын колунда. Башкы дарыгер Ажиев психиатриялык ооруканада дарыланууга муктаж эмес экенин жана «үй-бүлөсүнө кам көрүү үчүн келечекке реалдуу пландарды түзөрүн» белгиледи.
Буга байланыштуу соттук-эксперттик психиатрлар комиссиясы мажбурлап дарылоону өзгөртүү өтүнүчү менен кайрылууда.
Соттук териштирүүдө прокурор өтүнүчтү канааттандырган жок. Судья Сыдыков өз кезегинде өтүнүчтү канааттандырды.
Ошол эле учурда Ажиев инстаграм баракчасына Дубайда эс алып жүргөн сүрөттүн, видеосун жарыялган.
