Мындан туура 10 жыл мурда 2010-жылы бийликтин жүргүзгөн саясатына каршы оппозиция өкүлдөрүнүн революциялык кадамдары бийликтин кулашына жана Убактылуу Өкмөттүн башкаруусуна алып келген. Ал кезде бийлик башында Курманбек Бакиев турчу. Толкундоолор 6-апрель күнү Талас шаарында башталып, коопсуздук күчтөрү менен кагылышууга алып келген. Кийинки күнү Кыргызстандын бардык аймагын кучагына алып, эл президент Бакиевдин отставкага кетүүсүн талап кылган. Көптөгөн маанилүү имараттарын элдин колуна өтүшү менен Бакиев өзүнө кол чогултуу үчүн кичи мекенине качкан. Министрлер кабинети отставкага кетип, бийликти Роза Отунбаева башында турган убактылуу өкмөт колуна алган. 15-апрелде Бакиев өлкөдөн качып, коңшу Казакстанга барып, ал жактан отставкага кеткендиги тууралуу арыз жазган.Апрелдин 19у Белорусияга качып, ал жактан баш паанек алган. Быйыл революциянын 10 жылдыгы мамлекеттик деңгээлде белгиленмек, тилекке каршы учурдагы кырдаалга байланыштуу иш-чаралар токтотулган.
