УКМКнын атын жамынып акча талап кылган жаран кармалды
- 22.09.2021, 11:22,
- Коом / Жаңылыктар
- 0
Facebook
Вконтакте
Одноклассники
Google+
Ысык-Көлдө УКМКнын жалган кызматкери кармалды. Бул тууралуу Ысык-Көл ОИИБдин басма сөз кызматынан билдиришти.
Ал өзүн УКМКнын кызматкери катары көрсөтүп, ишкерлерден акча талап кылган. Анын жанында УКМКнын жасалма документи болгон.
«20-сентябрда Ысык-Көл РИИБдин криминалдык милиция кызматкерлерине Чолпон-Атадагы дарыканалардын биринде белгисиз адам УКМКнын кызматкеримин деп тааныштырып, акча талап кылганы тууралуу ыкчам билдирүү түшкөн. Ал дарыканадан 5 миң сом талап кылып, акчаны алып кеткен», - деп билдиришти басма сөз кызматынан.
Аталган факт Ысык-Көл РИИБде КЖБРге катталып, Жазык кодексинин 359-беренеси («Документтерди жасоо») менен сотко чейинки өндүрүш иштери башталды.
Милиция кызматкерлеринин ыкчам иш-аракеттердин негизинде өзүн Улуттук коопсуздук кызматынын кызматкери катары тааныштырган Чүй облусунун 34 жаштагы жашоочусу кармалган. Ал Ысык-Көл РИИБдин убактылуу кармоочу жайына киргизилген.
