Муздаткыч өчүп калып, "Спутник V" вакцинасынын 930 дозасы жарактан чыкты.

Бишкектеги №2 үй-бүлөлүк медицина борборунда муздаткыч өчүп калып, "Спутник V" вакцинасынын 930 дозасы жарактан чыкты. Бул маалыматты Республикалык иммундук профилактика борборунун директору Гүлбара Ишенапысова тастыктады.

"Муздаткыч 30-апрель күнү өчүп калган. Кийин андагы 930 доза вакцина алып салынды. Мындан улам аталган үй-бүлөлүк медицина борборунун жетекчилигине сөгүш жарыяланды. Маселени андан ары Бишкек шаарынын Саламаттык сактоо департаменти карап жатат", — деди адис.
 
Анын айтымында, жарактан чыккан препараттар вакцинанын биринчи компоненти болчу. Учурда Кыргызстанда анын экинчи компоненти бар. Ошол себептүү өндүрүүчүлөр менен бузулуп калган вакцинанын ордун толтуруу боюнча сүйлөшүүлөр жүрүп жатканы кошумчаланды.