Жолдошум 3 бир тууган. Кайынсиңдим биз менен турат. Кайын атам менен кайын энем айылда кичүү уулу менен жашашат. Кайынсиңдим күйөөм менен да, кайын энем менен да уруштура берип тажатты. Былк эткендин баарын апасына айтып, апасы баласына айтып, үйдө кудайдын куттуу күнү уруш.
Байкесин кызганып, мага жакшы мамиле кылса эле жулкулдап, мүнөзү өзгөрүлөт. Кыздай болуп үйдө бир оокат кылган эмес. Ичип, жеп, сабагына барып келип, каалаган маалда каалаган жагына барып коюп эле жүрөт. Эс алуу күндөрү бөлмөсүнөн чыкпай уктайт. Улуу балам төрөлөөр төрөлгүчө ушунун айынан канча жолу стресс алып араң төрөдүм. Жолдошум мага бир шоколад көтөрүп келсе да уруш чыгарып, апасына чалып антпей койду, минтпей койду деп арызданат.
Күндөрдүн биринде үйгө менин сиңдим келип калды. Бир күн болсо да биздикине жатып кет деп коноктоп узатсам апасына айтып, апасы мага чалып кызыма жаман мамиле кылат экенсиң да сиңдиң келсе жанталашып сылайт экенсиң деп уруш чыгарышты.Сиңдим биздикине ансыз деле ушулардын айынан келбейт, анда-санда бир келсе тамак жасайм да. Кайнысиңдиме күнүгө эле тамак жасап жүрөм го. Көп нерсесине чыдагам, бул сапар чыдай албай айтыша кеттим. Кечинде жолдошум келип, апам менен эмне уршуасың, жалгыз карындашым өз үйүмө батпай койду деп мага кыйкырып кирди. Түшүндүргүчө эле карындашынын көзүнчө жаакка чаап жиберди. Абдан ызаландым, уулумду жаңы эле төрөп, өзүм араң турган жаным ачуум менен ата-энемдикине кетип калдым.
Ошентип уулум 4 ай болгуча айылда жүрдүм. Бир күнү жолдошум барып кечирим сурап алып кетти. Келсем үйдүн кирин сурабаңыздар. Байкесин ошончо жакшы көрөт экен, кызганат экен, байкесинин акчасы жакшы экен, үйүн жыйнап, кирин жууп берип койбойбу?! Айтор кайра жашап баштаганда кайра эле баягы окуя кайталана берди. Ошентип 3 жолу ажырашып, 3 жолу жараштык. Турмушка чыгып кетсе жаным жай алып калаар деп азыр көңүл да бурбай калдым. Бир да жолу бөбөктөрүм деп балдарымды көтөрүп же терметишип койбойт. Апасы болсо кызымды балдарың уктатпай, экзаменге даярдана албай жатат деп чалат. Айтор ушунча тажап бүттүм. Менин деле байкем бар, бирок мынчалык кызганбайм. Андан көрө өз оокатын өзү кылсын деп кудайдан тилеп отурам. Бул эмнеге мынча мени жек көрөөрүн билбейм...
