Жогорку Кеӊеште педофилдерге өлүм жазасын киргизүү сунушу көтөрүлдү

     Депутаттар Кадамжай районунда 14 жаштагы кызды өлтүрүүгө жана зордуктоого шектелип кармалгандар тууралуу Ички иштер министринин маалымат берүүсүн талап кылышты.
 
Жогорку Кеңештин жыйынында депутат Ырысбек Атажанов педофилдерге өлүм жазасын киргизүү маселесин карап чыгуу зарылдыгын айтты.
 
Жогорку Кеңештин депутаты Алишер Козуев кесиптештеринин сунушун колдоп, жашы жете электерге карата зомбулук боюнча учурдагы жаза- чараларын карап чыгуу үчүн тез арада депутаттык комиссия түзүү керектигин белгиледи.
 
Депутат Марлен Маматалиев август айында КР Кылмыш-жаза кодексине балдарга зордук-зомбулук көрсөткөндүгү үчүн өмүр бою эркинен ажыратуу жазасы күчүнө киргенин эске салды. Ал депутаттарды аталган мыйзамдын иш жүзүндө кандай иштеп жатканын көзөмөлгө алууга чакырды. 
 
Эске салсак, Кадамжай районунда үч жаран окуучу кызды зордуктап, өлтүрүүгө шектелип кармалган. Сөөк Ноогардан айылына жакын жерде жайгашкан тоннелден табылып, кыздын зордук-зомбулук менен өлтүрүлгөнү аныкталган.