Коронавирустун кесепетинен Кыргызстандын экономикасы 40 миллиард сомго чейин жоготууга учураары айтылып жатат. Президент Сооронбай Жээнбеков коронавирустун залакасын жумшартуу, социалдык-экономикалык оорчулуктан чыгуу үчүн бир нече мамлекеттен, он чакты эл аралык финансылык мекемелерден дээрлик 1 миллиард долларлык акчалай жана гуманитардык жардам сурады.
Учурда Эл аралык Валюта Фондунан келген 120 млн. доллар бюджетти колдоого чегерилди. Ошондой эле, Дүйнөлүк банк 12 млн. доллар (50% – насыя, 50% – грант) көмөк жиберди. Германиянын GIZ уюму гуманитардык жардамга 550 миң евро грант чечти.
Ал эми, Азия өнүктүрүү фондунан 100 млн. доллар, Европа өнүктүрүү жана реконструкциялоо банкынан (ЕБРР) 100-150 миллион доллар жардам алуу боюнча сүйлөшүүлөр жүрүп жатат. Мындан сырткары Ислам өнүктүрүү банкынан да 11 миллион доллар жардам бериши мүмкүн.
Премьер-министр Мухаммедкалый Абылгазиев 11-апрелде республикалык штабдын жыйынында: «Тышкы жардамдын көлөмү боюнча айтсак, болжолдуу түрдө 450 миллион АКШ долларын түзөт. Бул каражат бюджетти жана бизнести колдоого багытталат», - деп билдирди.
Расмий Бишкек бүгүнкү күнгө чейин Кытай, Швейцария, Жапония, Түштүк Корея, Бириккен Араб Эмираттары, Кувейт, Түркия, Казакстан, Өзбекстан сыяктуу мамлекеттерден гуманитардык жардамдарды алды. Алардын суммасы ар кандай көлөмдө.
Баш-аягы Кыргызстан чет жактан сураган финансылык жана гуманитардык жардамдын суммасы болжолдуу 1 млрд. доллардын тегерегинде болуп жатат. Жагдай оорлосо бул сумма дагы өсүшү мүмкүн.
Азыркы тапта, бюджеттен коронавируска каршы күрөшүү үчүн жалпысынан 340 млн. сом бөлүнсө, азыркы учурда анын 183 млн. сому сарпталганын премьер-министр Абылгазиев белгиледи.
Башкача айтканда, Өзгөчө кырдаалдар министрлигине 173. млн сом, Ветеринардык жана фитосанитардык коопсуздук боюнча мамлекеттик инспекцияга 3 млн. сомдон ашык акча, Тышкы иштер министрлигине 769 миң сом, Транспорт жана жолдор министрлигине 94,5 миң сом бөлүнүп берилген. Ал эми Саламаттык сактоо министрлиги үчүн атайын бөлүнгөн 40 млн. сом бөлүнгөн. Калган 116,6 млн. сом керектөөлөргө жараша бөлүштүрүлөт.
Мындан сырткары, кризистен чыгуу үчүн бизнес секторун колдоого 14 млрд. сом сарпталарын вице-премьер-министр Эркин Асрандиев айтты.
