Пандемия учурунда келишим болгон, кимдир-бирөөлөр бизнес жасап жүрүшкөн. Бул тууралуу вице-премьер-министр Элвира Сурабалдиева фейсбуктагы баракчасына жазды.
«Айрым мамлекеттик ведомстволордун керектүү документтери жана маалыматтары кечигип жаткандыгына байланыштуу, COVID-19 коронавирус пандемиясы учурунда Кыргызстанга келип түшкөн жардамдын бөлүштүрүлүшүн изилдөө боюнча ведомстволор аралык комиссиянын ишин 2021-жылдын 15-январына чейин узартуу керек болду. Комиссиянын курамына медициналык эксперттер, журналисттер жана ишмердүүлүктүн ар кандай тармактарынын өкүлдөрү кирет.
Бүгүн алдын ала жыйынтыктарды уктум. Натыйжалар жана тыянактар, кырдаалды өзгөртүү боюнча сунуштар коомчулукка жарыяланат.
Белгилей кетүүчү нерсе, ведомстволор аралык комиссиянын жарымы алгачкы күндөрү эле иштебей калган, кимдир бирөө мүмкүн болуучу кесепеттерден чочулап, достору жана тааныштары кимдир бирөөгө келип, мындан ары чуулдата бербөөнү суранышкан. Калгандары, алардын ысымдарын жакынкы аралыкта жыйынтык менен кошо жарыялайбыз, Кыргызстандагы өзгөрүүлөрдү, саламаттыкты сактоо тармагында реалдуу реформаларды каалаган патриоттор.
Ведомстволор аралык комиссиянын корутундусуна ылайык, пандемиядан каза болгондордун айырмасы бир нече миңди түзөт деп алдын ала айта алам.
Ковид-19дун биринчи толкунунун ортосунда айрым чиновниктер документтерди жашырып, дарылоо жана дары-дармек менен башаламандыкка себеп болушкан. Келишим болгон, кимдир бирөө пандемия менен бизнес кылып жүргөн.
Буга чейин айтылгандай, ведомство аралык комиссиянын ишинин жыйынтыгы боюнча, бир дагы катардагы дарыгерге доомат болбойт. Дарыгерлер жарандарды баатырларча куткарып жатканда, айрым жетекчилер узак мөөнөттүү эмгек өргүүсүнө качып кетишкен.
Гуманитардык жардамды уурдап алуу болгонбу? Ооба. Ведомстволор аралык комиссия көйгөйлөрдү ачып гана тим болбостон, аларды чечүү боюнча сунуштарды берет.
Реформалар керек. Мамлекеттик каражаттарды, гуманитардык жардамдарды, насыяларды жана гранттарды бөлүштүрүүнүн так системасы, баардыгында ачык-айкындуулук болушу керек. Ар бир министрлик жана ведомство киреше жана чыгашалар жөнүндө эл алдында отчет берүүгө үйрөнүшү керек. Калганы ведомстволор аралык комиссиянын жыйынтыгында», -деп жазды Сурабалдиева.
