Жеңиш Разаков иштен алынды

Буга дейре коомдо катуу сынга алынып, кызматтан алынышы керектиги талкууга алынып келген вице-премьер-министр Жеңиш Разаков иштен кетти. Бул тууралуу жарлыкка президент Сооронбай Жээнбеков кол койду. 

Дээрлик эки жыл, башкача айтканда 2018-жылдан бери вицелик кызматты аркалаган Разаков ЕАЭБ иштери жана чек ара маселеси боюнча кураторлук кылган. Кой-Таш окуясы боюнча түзүлгөн комиссияны жетектеген. 

 Акыркы учурда кыргыз-тажик чек арасында байма-бай катталган чек ара чырына байланыштуу коомчулукта Жеңиш Разаковго карата нааразычылык күчөгөн. Маалымат булактарында Тажик Коопсуздук комитетине жазып чыккан түшүнүк каты жарыяланып, жогорку кызматты аркалоого укугу барбы деген шектүү, бүдөмүк ойлорду жараткан болчу.