Бишкек шаарын Эмилбек Абдыкадыров деген "абышка мэр" башкаргандан бери, бийликтеги төбөлдөр ооздорунан түшүрбөй мисал кылгандай, 30 жылдын ичинде шаар тургундары мынчалык жүдөбөсө керек.
Дегенибиз, шаардын бир катар аймактары жуунганга, ал түгүл ичкенге суусу жок калышты. Көп кабаттуу үйлөрдө жашагандар туалетке бара албай кыйналышты. Бул маселе дагы деле чечилбей турат. Айлап суусуз калат деген кордук, чындап отуз жылдан бери боло элек эле.
Өкүнүчтүүсү, жайында суусуз акактаткан "абышка", шаар тургундарын кышында жылуулук бербей, көмүрсүз калтырып суукка тоңдурбаса болду дешип кыжалат болгондор көп. Себеби, быйыл Токтогул суу сактагычында суу аз. Бишкек ТЭЦине бир тоголок көмүр түшө элек. Кышка даярдык жүрүп жатканы байкалбайт. Андыктан, шаар эли жайында суусуз калышканы аз келгенсип, кышында ыш-түтүнгө басылып жылуулуксуз калышса, абышка мэр жоопкерчилик тартабы? Же «Батуми» чырындагыдай орун басары Нурдан Орунтаевди «салып берип» коюп, өзү суудан кургак чыгабы?
Деги эле Бишкектин көркү кетти. Бак-дарактар оңдуу сугарылбай саргайып, гүлдөр куурап, таштанды убагында чыкпай чирип, жыттанып, сасып шаардын кунары качты. Бир гана мэр Абдыкадыров көрбөй, укпай жатабы, же иштегенге энергиясы калбай шалдырап отурабы, айтор шаардын ишпалдасын чыгарып бүттү. Ушундай кадрлар менен анан кантип өлкө оңолот?
