Экс-президент Алмазбек Атамбаев №8 түзөтүү колониясына которууну суранды. Бул тууралуу ал журналисттерге сотто билдирди.
Бүгүн, 6-апрелде Биринчи май райондук сотунда 2020-жылдагы Октябрь окуясы боюнча соттук отурум уланды. Атамбаев бул иш боюнча айыпталуучулардын бири катары суралууда.
Мурдагы мамлекет башчысы учурда 47-түзөтүү абагында кармалып турат. Буга чейин Жаза аткаруу кызматы бул абак жана СИЗО-1 абактары бузулуп, ал жердегилер башка абактарга которула турганын билдирген.
«Мен №8 түзөтүү абагына которууну сурандым. Ал жакта мага карата мыйзамсыздык азаят. Бирок, кайсы жерге которсо ошол абакка барам», -деди ал.
Атамбаевдин айтымында, абактагылар ага урмат-сый менен мамиле кылышат.
«Алар мен үчүн балдарымдай эле. Боорум ооруйт. Шарттар 21-кылымга ылайык эмес», - деп белгиледи Атамбаев.
Ошондой эле ал бул соттук отурум 7-апрелге туш келгени, Бакиевтерди кубантууга арналганы деп эсептейт.
№8 түзөтүү абагы Москва районундагы Петровка айылында жайгашкан.
