Артём Новиков: "Опера балет театрындагы окуядай көрүнүш мындан ары болбошу керек"

Биринчи вице-премьер-министр Артём Новиков өлкөнүн бир дагы театрында спектаклдерди үзгүлтүккө учураткан учурлар мындан ары кайталанбашы керек деди маданият өкүлдөрү менен жолугушууда. Бул тууралуу ал Маданият, маалымат, спорт жана жаштар саясаты министрлигинин жетекчилиги, ошондой эле Абдылас Малдыбаев атындагы кыргыз улуттук опера жана балет театрынын жетекчилиги, артисттери менен жолугушууда билдирди.

Анда 6-мартта орун алган окуя тууралуу сүйлөшүүлөр болуп, театрдын айрым артисттеринин спектакль коюудан баш тартуу себептери талкууланды.

"Спектакль үзгүлтүккө учураган. Бул окуяда эң кейиштүүсү жөнөкөй көрүүчү жапа чекти. Залдын ичи элге толуп, эстетикалык рахат алууну каалашкан. Артисттердин дагы, жетекчиликтин дагы өз чындыгы бар. Бирок мындай көрүнүш мындан ары болбошу керек. Бул өңдүү маселелерди кийинкиге, көз жаздымда калтырбай чечүү зарыл", - деди Новиков.

Биринчи вице-премьер-министр өкмөт маданият жаатында жаңы ыкмаларды киргизээрин баса белгиледи.
Ал Маданият, маалымат, спорт жана жаштар саясаты министрлигине менчик уюмдар менен биргеликте өткөрүлгөн спектаклдерге катышкандыгы үчүн театр артисттеринин эмгек акысын жөнгө салуу маселелерин мыйзам деңгээлинде иштеп чыгууну тапшырды.
Артём Новиков театрдын мурда сунушталган репертуарын калыбына келтирүүнү эске алуу менен ар кандай жана кызыктуу спектаклдердин программасын түзүүнүн маанилүүлүгүн белгиледи.
Жогоруда аталган театрда 6-мартка белгиленген спектакль коюлбай калган. Анда театрдын айрым артисттери коммерциялык спектаклге акы төлөнбөйт деп баш тартышкан.