Бишкек шаарынын коменданты Алмаз Орозалиев, «Карантин учурунда үй-бүлөлүк зомбулук күчөдү»

Карантин учурунда үй-бүлөлүк зомбулук күчөгөнүн Бишкек шаарынын коменданты Алмаз Орозалиев 24-апрелде Бишкек шаарындагы коменданттык абал туурасында маалымат берип жатып билдирди. 
 
«Белгилей кетчү жагдай, өзгөчө абал учурунда үй-бүлөлүк зомбулук фактыларынын саны өсүп кетти. Өткөн жылга салыштырмалуу бул факт 61, 7 пайызга өскөн. Былтыр үй-бүлөлүк зомбулук боюнча 24-марттан 23-апрелге чейин 100 факты катталса, бүгүнкү күндө 162 факты катталды»,- деп билдирди Алмаз Орозалиев. 
 
Ал элге кайырылып, бул оор күндөрдүн өтөрүн айтып, элди ынтымакка чакырды. 
 
«Азыр баарыбыз үйдө отурабыз. Абалды түшүнүү менен кабыл алып, үй-бүлөӊөрдү зомбулуктан сактагыла. Бул оор күндөр да өтөт. Жакында жакшы жашоого багыт алабыз, андыктан үй-бүлөӊүздөрдү ур-токмоктон коргоп, ынтымактуу болуӊуздар»-, деди ал.