"Оо адамдар күнөөгө батпагыла,
Добулбасын ажалдын какпагыла!
Ашып кетсе адамзат жүз жыл жашайт,
Бири-бириңди суранам атпагыла!
Оо адамдар, дарт ойлоп таппагыла,
Бириңерге бириң ор казбагыла!
Оорубасын асман, жер суранамын,
Жамандыктын үрөөнүн чачпагыла!
Токтогула, акылдан азбагыла!
Абийир, ыймман, сүйүүнү сатпагыла!
Адам асыл, адамзат улуу деген,
Ишенимин кудайдын актагыла!" дал ушул саптардын автору, акын, жазуучу Жыпар Исабаева "Fabula.kg" сайтынын онлайн маегинин мейманы болду. Акын окурмандар үчүн жан дүйнөнү аруулаган ырларын окуп берип, ырлары, чыгармалары тууралуу кызыктуу маек куруп берди. Ошондой эле жаш муун китеп окубай калды деген ойдон алыс экенин кошумчалап, анын чыгармаларын издеп окуган, ыр жазгысы келген, чыгарма жаратам деп далалат кылган жаштардын көп экенин айтты.
Маектешкен Нуркыз Рыскул кызы
