Коронавирустан бир жылда 106 медициналык кызматкер каза болду

 Өткөн жылы 18-мартта Кыргызстанда коронавирусту жуктуруп алган алгачкы учур катталган. Коронавирус илдетине чалдыккан алгачкы адамдар Сауд Арабиясынан Умра (кичи ажылык) сапарынан кайтып келген зыяратчылар болушкан эле.
 
Саламаттыкты сактоо жана социалдык өнүгүү министрлигинин маалыматына ылайык, бир жылдын ичинде коронавирус жана пневмониядан 106 саламаттыкты сактоо кызматкерлери көз жумган. Каза болгондордун арасында башка бөлүмдөрдө жана жеке уюмдарда иштеген 14 дарыгер болгон.
 
2020-жылдын март айынан бери медициналык кызматкерлердин COVID-19 жугуштуу оорусунун 4 миң 208 учуру катталып, алардын ичинен 4 миң 195 медкызматкер айыгып кетишкен.