Сүзмөнү буту менен тебелеп, курут жасаган аялдын видеосу Өзбекстанда тартылган

Социалдык тармактарга аялдын буту менен сүзмөнү тебелеп жаткан видеосу тараган.  Андан жерге төшөлгөн ак каптын үстүндөгү сүзмөнү аял көлөчү менен басып жатканын көрүүгө болот. Бул видео Өзбекстанда тартылганы тууралуу өзбек  басылмалары жазып чыкты.  Маалыматына ылайык, бул көрүнүш Самарканд облусунун Иштыхан районунда орун алган.

Каллахос айылынын тургуну курут жасоо менен алектенет. Ал сүзмөнү аралаштырууга күч-кубаты жетпегенин, ошол учурда жолдошу үйүндө жок болгондуктан буту менен аралаштырууга туура келгенин айткан. Бул учурду кошунасы видеого тартып, буга чейин мындай кызыкты көрбөгөнүн, жаман ойдо тартпаганын билдирген.

Видео интернетке тарагандан кийин тиешелүү кызматтар иш алып барышкан. Санитардык-эпидемиологиялык көзөмөл борбору буга чейин даярдалган куруттарды жана сүзмөнү жок кылышканы айтылат маалыматта.