Артем Новиков: "Мектеп, бала бакчалардын кадимки режимде иштөөсү эл үчүн өтө маанилүү "

Биринчи вице-премьер-министр Артём Новиков Бишкек шаарындагы мектепке чейинки жана мектеп билим берүү мекемелеринин ишин кадимки режимде этап-этабы менен баштоо маселеси боюнча кеңешме өткөрдү. Бул тууралуу өкмөттүн басма сөз кызматынан билдирди.



"Мектептердин жана бала бакчалардын ишин кадимки режимде этап-этабы менен калыбына келтирүү биз жана калк үчүн маанилүү. Жакынкы күндөрү борбордогу мектептердин окуучуларынын ата-энелери менен жолугушуп, алар менен мектептердин ишин мындан ары жандандыруу маселесин талкуулоону пландап жатам. Бишкек шаарындагы мектептер менен бала бакчалардын иши башталганда санитардык-эпидемиологиялык эрежелердин так сакталышын камсыз кылуу маанилүү. Ошол эле учурда мэрия мектепке чейинки жана мектептеги билим берүү мекемелериндеги балдардын жана окуучулардын ден соолугуна медициналык көзөмөл жүргүзүп, санитардык-эпидемиологиялык абал начарлап кетсе, токтоосуз карантиндик чараларды киргизүү керек.
Мурунку системаны калыбына келтирүү маанилүү, анткени медициналык адистер мектептерде иштеп жатканда ар бир окуучуга карточка ачылып, балдардын бакубат жашоосу үчүн тиешелүү көзөмөл болгон. Бүгүнкү күндө республика боюнча бала бакчалардагы жана мектептердеги балдардын ден соолугуна медициналык көзөмөл жүргүзүлүп жатат", - деди Артём Новиков.

Биринчи вице-премьер-министр Билим берүү жана илим министрлигине Саламаттыкты сактоо жана социалдык өнүгүү министрлиги менен биргеликте бир жуманын ичинде каржылоо булагын аныктап, "Мектеп медицинасы" долбоорун ишке ашыруу үчүн каржылык эсептөөлөрдү жүргүзүүнү тапшырды.

Саламаттыкты сактоо жана социалдык өнүгүү министрлигине бир жуманын ичинде Бишкек шаарындагы саламаттыкты сактоо уюмдарынын кезмет бөлүмдөрүн мектепке чейинки жана мектептеги билим берүү мекемелеринде балдардын ооруу деңгээли жогорулаган учурда медициналык жардамды уюштурууну аныктап, тиешелүү маалыматты Бишкек шаардык мэриясына жөнөтүү тапшырылды.