ШКУнун саммитинде кыргыз-тажик чек арасындагы жаңжал боюнча сөз болгон жок...

Кыргызстандын президенти Садыр Жапаров Шанхай кызматташтык уюмуна мүчө мамлекеттердин башчыларынын жыйынында сөз сүйлөдү. Ал өз сөзүндө кыргыз-тажик чек арасындагы жаңжал боюнча бир ооз сөз айткан жок.
 
Садыр Жапаров ШКУнун иш жылдарындагы ийгиликтерине токтолуп, Өзбекстандын президенти Шавкат Мирзиёевге ШКУнун саммитин уюштургандыгы үчүн ыраазычылык билдирди жана Индиянын премьер-министри Нарендра Модини өлкөнүн уюмдагы төрагалыгына өтүшү менен куттуктады. Ал 26-июлда Ташкентте өткөн Ооганстандагы кырдаал боюнча эл аралык конференция тууралуу айтты. 
 
Ошондой эле Кыргызстандын президенти Бишкекте эл аралык уюшкан кылмыштуулук менен күрөшүү борборун ачууга чакырып, Кытай-Кыргызстан-Өзбекстан темир жолун куруунун маанисине токтолду.
 
Мамлекет башчысы азык-түлүк коопсуздугу жана климаттын өзгөрүүсүнѳ  ыңгайлашуу маселелери тууралуу сѳз кылды. 
 
Садыр Жапаров дээрлик 12 мүнөт сүйлөдү, бирок бул аралыкта кыргыз-тажик чек арасындагы жаңжал тууралуу бир да сөз айтылган жок.
 
Тажик президенти Эмомали Рахмон да өз сөзүндө чек арадагы жаңжал тууралуу айткан жок. Жолугушууга катышкан башка мамлекеттердин башчылары да кыргыз-тажик чек арасындагы чыр чатак тууралуу сѳз козгошкон жок.