Өкмөт Төө-Ашууга акы төлөп өтүүчү тоннель кургусу келет

Биринчи вице-премьер Алмазбек Баатырбеков Бишкек — Ош жолундагы Төө-Ашууга акы төлөнүүчү туннель куруу боюнча инвестициялык демилгени карап, кеңешме өткөрдү. Бул тууралуу өкмөттүн маалымат кызматы кабарлады.

Ага ылайык, Баатырбеков аталган трасса республиканын түндүк жана түштүк бөлүгүн байланыштырган негизги транспорттук каттам болуп саналарын айткан.

"Бул жолдун стратегиялык мааниси чоң. Ошондуктан оор жүк ташуу, коопсуздук, аба ырайынын катаал шартында каттамдын бузулушун алдын ала турган альтернативдүү туннель куруу боюнча инвестициялык долбоорлорду кароо жана талкуулоо чечими кабыл алынды", — деди биринчи вице-премьер.