Мурдагы билим берүү министри Чынара Жакыпова Улуттук коопсуздук мамлекеттик комитетинен (УКМК) оозеки чакыруу алганын Фейсбуктагы баракчасына жазды.
Ал бул тууралуу: “Мага эки жигит келип, эртең (17-июнь) саат 15те кылмыш иши боюнча УКМКда барышымды эскертишти. Бирок кайсыл кылмыш иши экенин айтышкан жок. Документтерин да жөндүү көрсөтүшпөдү. Эртең чакыруу кагазы болорун айтышты”,- деп билдирди.
Коомдук ишмер, мурдагы билим берүү министри Чынара Жакыпова "Сорос Кыргызстан" фондунун алгачкы жетекчиси болгон.
2-июнда "Сорос Кыргызстан" фондунун учурдагы директору Шамил Ибрагимов да УКМКга тергөөчүсүнө чакыртылып, ага фонд отурган имарат боюнча суроолор берилгенин айтып таӊ калганын билдирген болчу.
"Сорос Кыргызстан" фонду Кыргызстанда 1993-жылдан бери иш алып барат. Фонд жети тематикалык тармакта гранттарды берет. Алар - коомдук саламаттыкты сактоо, билим берүү, укук, жарандык катышуу, массалык маалымат каражаттарын өнүктүрүү, санариптешүү, изилдөө багыты.
1993-2018-жылдар аралыгында аталган багыттарда ар түрдүү жергиликтүү уюмдарга жалпы 98 миллион 800 миң доллар грант берген. Бөлүнгөн гранттардын 39% саламаттык тармагына берилүүдө.
