Жыпаргүл Баргибаева: "Качан эле кыргызда аял-аялга күйөөгө тийип, эркек-эркекке үйлөнчү эле? "

Кечээ, 10-мартта болуп өткөн тынчтык митингинде ак элечегин кийип, энелердин атынан сөз сүйлөйүн деген «Ала-Тоо айымдары» коомдук кыймылынын төрайымы Жипара Баргибаевага уюштуруучулар сөз бербей, жоон топ кыйкырык-сүрөөн менен журналисттерге да пикирин билдирүүгө тоскоол болуп коюшту.  Кыргыз кыздарынын даңкын далайга таанытып жүргөн коомдук ишмерге микрофон узатып, пикирин уктук...

- Жыпаргүл айым, кечээ Сизди топтон сүрүп чыгарып салышты деп жазып жатышат. Видеодо чынында эле сөз сүйлөтпөй тоскоол болгонун көрдүк...

- Ооба, мен кечээ 10-мартта катардагы жаран катары тынчтык митингге барып, эл катары микрофон алып сүйлөйүн деп уюштуруучулардан сөз берүүсүн өтүндүм. Бирок уюштуруучулар ачык эле сизге сөз бере албайбыз дешти. Мени эч ким сүрүп чыккан жок, болгону милициялар провокация болуп кетпесин деп, калкалап алып чыгып кетишти. Эгер чындап аялдардын укугу бузулуп жатат, зордук-зомбулукка каршыбыз дешсе эмнеге жөнөкөй жарандарга сөз беришпейт? Жаман сөз айтпайбыз, зордук-зомбулукка каршы пикирибизди айталы деп жатам десем да болбой коюшту. Өзүңүздөр көргөндөй журналисттерге пикиримди билдирейин десем да  "уят" деп кыйкырып угузбай коюшту.  Эмнеси уят? Кыргыздын кызы, энеси, аялы болгонубуз уятпы?  Калп эле зордук-зомбулукту бетиңерге кармап батыштын саясатын кыргыз элине таңуулабагыла, качан эле кыргыз кызы жылаңачтанып музейге барып, көчөгө чыгып алып "төрөбөйм", "менин жатынымды өзүм билем", "чай куйбайм" деген сыяктуу оозго алгыс сөздөрдү айтчу эле дейин дегем. Чындап зордук-зомбулукка каршы митинг болсо кыргыз аялдарынын чыныгы укуктары, баалуулуктары жөнүндө сөз болмок. Качан эле кыргызда аял-аялга күйөөгө тийип, эркек-эркекке үйлөнчү эле? Булар үй-бүлө баалуулуктарын бузуп жатышпайбы. Биз мындай бузукулукка жол бербөө максатында 2 жыл мурда өткөн курултайда  конституцияга "эркек менен эркек үйлөнгөнгө укугу жок, аял-аялга турмушка чыга албайт" деген мыйзамды киргизүүнү сунушталгабыз.  Кыргызстанда бузукулукка жол берилбей, ата-бабаларыбыздан бери мурас болуп келген үй-бүлөлүк мызам сакталып калышы керек.