Нуржигит Кадырбеков 100 күн ичинде ага жардам берген бардык кызматкерлерге ыраазычылык билдирди

Маданият, маалымат жана туризм министри кызматынан бошотулган Нуржигит Кадырбеков 100 күн иштеп, ээлеген ордунан президенттин жарлыгы менен бошотулду. Ал кызматын тапшыраар алдында министрликтин, департаменттердин жана ага тиешелүү мекемеде эмгектенген кызматкерлер менен жыйын өткөрдү. Бул тууралуу аталган министрликтин басма сөз кызматынан билдиришти.

"Жыйында министр кызматында жасалган иш аракеттер тууралуу маалымдама жасап, өз салымын кошкон бардык адистерге ыраазычылыгын айтты. Ал өз сөзүндө, маданият тармагында жасала турган иштер абдан жооптуу экендигин айтып, аны өнүктүрүүгө бардык күч-аракеттерди жумшоо зарыл деп билдирди. Ошондой эле жыйындын жүрүшүндө ар бир тармак боюнча жетишкен ийгиликтерди баса белгилеп, алдыда бул багытта жасала турган иштер арбын экендигине токтолду" дейт маалыматта.