"Элден элге бекер нан" долбоору аркылуу көптөгөн муктаж үй-бүлөлөргө нан таратып, кыйчалыш кырдаалда жардамга кол сунуп жүргөн кыргыздын кайрымдуу уулдарынын бири Алмаз Раимбеков менен баарлаштык.
- Алмаз мырза, "Элден элге бекер нан" долбоорунун башталышы тууралуу айтсаңыз. Идея өзүңүздүкү экен, ишке ашыруу кандай болду?
-Карантин башталганы биз деле үйдө отурдук. Апрелдин башында интернеттен түрктөрдүн "асылган нан" аттуу видеосун көрүп калдым. Идеясы абдан жакты! Жылда өз айылыма ун таратып койчумун. Мындай кырдаалда шаардын четиндеги конуштагылар кыйналып баштаганын көрдүм. Бурана айыл өкмөтүнө чалып кабар алсам, жардамдар кенен келип баштады дейт. Анан досторум менен идеяны бөлүштүм. Алтымышев Тынчтык, Ашымов Руслан, Султанов Ильгиз, Абдраев Марат, Абдрахманов Марс досторубуз колдоп, ар бирибиз конуштардагы, Токмоктогу, Кеминдеги дүкөндөр менен сүйлөшүп баштадык. Тынчтык досум Мелис Турганбаевден колдоо күтүп, ЖАМКдин наабайканаларынан бекер бышыртмай болдук. Ар бирибиз колубуздан келгенин ортого коюп баштадык! 6 конуштан баштап, ылдам эле элден колдоо таптык. Канададан Джон Врайт досубуз да колдоп, Жогорку Кеңештин аттуу-баштуу депутаттары да колдоду. Көптөгөн жөнөкөй мугалимдер, тургундарыбыз, досторубуз, дүкөндөрдүн ээлери да колунан келген жардамын берип жатышты. Колдобой койгондор да болду, чоң эле аттуу-баштууларыбыз жардам беребиз деп, 1 жумадан кийин аялдары аркылуу бере албай калдык деп коюшту. Унубуз калбай калган күндөрү Аллахыбыз бизге жок жерден, ойлобогон жерден жардам берип жатты. Бүгүнкү күндө 75000 нан, 300 ыктыярчы жана дүкөнчүлөр иштеп, 20 конуш жана 4 шаарда тараттык.
