Өлкө башчысы Садыр Жапаров тажик тарап Кыргызстан буга чейин кол коюлган протоколдун шартын аткарбай жатасыңар деп кине коюп жатышканын 17-ноябрда парламентте айтты.
Анын айтымында, тажик тарап 12 жыл мурун ошол кездеги Коопсуздук кеңешинин төрагасы Адахан Мадумаров тарабынан кол коюлган Төрт-Көчөгө байланышкан протоколду бетке кармап келет.
Мындан улам, Тажикстан менен чектешкен жердеги Төрт-Көчө аймагына нейтралдуу макам ыйгаруу каралып жатканын билдирди.
Бул туурасында: "Сиз (Мадумаров — ред.) бул протокол мыйзамсыз экенин айтып келесиз. Бирок тиги тарап аны документ катары бетке кармап жатат. Астанада өткөн үч тараптуу жолугушууда (Кыргызстан, Тажикстан жана Россия жетекчилери) дагы көрсөтүштү, "мына, кол койгонсуңар, аткарбай жатасыңар" дешти. УКМК төрагасы Камчыбек Ташиев Душанбе менен эки ирет сүйлөштү, бул жерге нейтралдуу макам берсек деген ниетибиз бар. Мындай талаштуу жагдайда бул аймак биздики эмес, бирок силерге да таандык боло албайт деп ишендирдик. Экинчи тараптын пикири өзгөрүп кетпесе эле ушундай пландарыбыз бар", — деди президент.
Анын айтымында, кыргызстандыктардын Лейлекке, тажикстандыктардын Ворухка ээн-эркин кирип-чыгышына шарт түзүү каралып жатат.
"Нейтралдуу зона аныкталган жерде болот. Тажик тараптан 20дай, бизден 3-4 үй алынат", — деди Жапаров.
Буга чейин президент маектеринин биринде тажик тарап Төрт-Көчө боюнча маселе 12 жыл мурун чечилген деп айтканын билдирген.
"Ошол протоколго ылайык, биз бул жерлерди 49 жылга ижарага алыптырбыз. 37 жылдан кийин ижара мөөнөтү же узартылат, же токтотулат экен, андан кийин бул маселе талкууланбайт имиш", — деп айткан президент.
